As empresas editoras dos vinte diarios líderes, de maior circulación, nos países
iberoamericanos seguen sendo de propiedade familiar e continuadoras dos seus
creadores ou impulsores. Son as dinastías familiares dos Noble en Arxentina, Frías en
Brasil, Rivero Jordán en Bolivia, Santos en Colombia, Edwards en Chile, Pérez en
Ecuador, Polanco en España, Canahuati en Honduras, Dutriz en Salvador, Vázquez
Raña en México, Arias en Panamá, Zucolillo en Paraguai, Corripio en República
Dominicana, Miró Quesada en Perú ou Capriles en Venezuela. A identidade da
propiedade familiar das empresas e grupos de comunicación segue a ser aínda unha das
características e notas sobranceiras do panorama mediático. Esta comunicación estudia
as declaracións da súa misión empresarial e a Responsabilidade Social Corporativa
desas editoras, que son tamén cabezas de grupos diversificados de comunicación e de
outros negocios e intereses. A través deses tres esgos da identidade empresarial
(propiedade familiar, misión e responsabilidade social) preténdese contrastar o valor e
calidade dos principios editoriais (excelencia, credibilidade, reputación, independencia)
que proclaman as respectivas empresas de comunicación.